Ek Ladka tha. Uska naam tha Ajay. Woh bohut mehnati tha lekin, hamesha apni pariksha mein kam ank lata tha. Jaise-Taise bas woh pariksha mein pass ho jaata tha. Usne apni padhayi poori ki aur B.Com ki Degree prapt ki. Use ek company mein Accountant ki naukri lagi. Kama toh raha tha lekin, thoda bohut. Ajay ko apne jeevan se badi aashayein thi. Woh apne jeevan mein kuch bada kaam karna chahta tha.
Chutti ke din woh apne kamre mein baithe-baithe soch raha tha ki woh kaise apne jeevan ko aage badhaye. Tabhi use ek idea aaya. Idea yeh tha ki agar main kuch online business shuru karun toh, kaisa rahega. Usne internet par khoj shuru ki aur thodi bohut jaankari prapt ki. Par ab prashn yeh uthta hain ki kaam kya kiya jaayen? Tabhi use apne ek shikshak ki baat yaad aayi, "Moti hamesha samudra ke tat par hi milta hain." Usne socha ki, 'shikshak se seekh mili hain toh kuch shikshak ka hi kaam dekh leta hoon.' 'Parantu meri kamaai kitni ho paayegi ?' kuch der sochne ke baad usne nirnay liya ki kaam shuru karte hain aur phir sochte hain.
Ab prati din kaam se apne ghar lautne ke baad woh online apna kaam dhoondhana shuru karta. Kuch mahino ki mehnat ke baad use ek freelance shikshak ka kaam mila woh shaam mein us website par roz ghanta do ghanta baccho ko Ganit ki shiksha deta tha.
Kuch mahino baad, uski thodi acchi kamayi hone lagi. Usne apne liye ek naya Mobile kharid liya. Kuch naye kapde bhi kharide apne liye aur apne maata pita ke liye bhi. Dheere-Dheere use Marketing ka mahattav samajh mein aane laga. Aur woh us website ke saath-saath dusri websites par bhi apni marketing kar raha tha.
Dheere-Dheere Ajay apne kaam mein maharath prapt kar raha tha. Ab usne naukri chod di hain aur apna khud ka online business shuru kar diya hain, jisme woh kitabein bechta hain. Ab woh accha flat bhi kharid liya hain.
Sab kuch accha chal raha tha. Tabhi ek anjaan virus ne website par hamla kar diya. Aur website ka kaam ekdum se thap pad gaya. Kuch bik nahi paa raha tha. Log website kholte website par apni pasand ki kitaab chunte aur kitaab chunte hi website block ho jaata tha. Kai computer experts prayas kiye. Kuch dino baad samasya thik toh ho gayi parantu tab tak uska bohut bada nuksaan ho chuka tha. Ajay ki company dheere-dheere barbaadi ki aur jaa rahi thi. Aaj woh sar se lekar paav tak karz mein doob chuka hain. Karz poora na kar paane ki wajah se Ajay ke virudh case file ho gaya hain. Uske pita ki tabiyat bhi ab saath nahi de paa rahi hain. Saari musibatein ek saath aa padi. Ek taraf company band hone ki kagaar par thi aur dusri taraf Bank ka Karz chuka na paane ki wajah se case aur teesri taraf bimaar pita. Halaki ki koi khaas bimari nahi thi bas umar ke hisaab se sharer saath nahi de paa raha hain.
Ajay poori lagan ke saath nirantar prayaas kiye jaa raha tha. Woh logon se mil raha tha kuch logon se madad ke liye aur kuch logon se apni sales badhane ke liye. Agar zyada se zyada uski website se log kitabein kharidenge toh uski kamayi aur acchi ho paayegi. Parantu saare prayas vifal hote jaa rahe the. Vetan poora na milne ke kaaran uske company ke karamchari hadtaal par baith gaye hain. Pichle teen mahino se karamchariyon ko vetan kam mila hain. Ajay agar chahta toh woh kuch karamchariyon ko naukri se nikaal bhi sakta tha, parantu usne socha ki phir us karamchari ka aur uske parivaar ka bhavishya khatre mein pad sakta hain.
Kayi mahino ke baad bhi haalaat jas ke tas the. Ab Ajay jahan bhi jaata use Karzdaata gher lete aur apne paison ki maang karte. Ghar mein pahuchta toh log call kar-kar ke pareshan kar dete. Dhamkaane lagte.
Ab Ajay ki sehan shakti samapt ho chuki thi. Aur usne tai kar liya tha. Usne bohut hi khatarnak nirnay liya tha. Aur woh nirnay tha Aatmahatya ka.
Raat ke karib 2 baj rahe the. Jab saari duniya gehri neend mein so rahi thi, tab usne hamesha-hamesha ke liye sone ka nirnay kiya. Uske maan mein bohut saare vichaar chal rahe the, ki maata-pita ka kya hoga, duniya kya bolegi. Lekin woh apne Aatmahatya ke nirnay par adig tha. Ajay apne bistar se utha. Apne kamre ka darwaaza khola aur phir dabe pair ghar ke Main Door tak pohucha. Usne dheere se darwaaza khola aur bahar nikla phir, bilkul dheere se darwaaza band kiya. Aur dabe pair chalta gaya bina yeh soche ki woh kaha jaayega.
Kuch dur tak jaane ke baad use ek nadi dikhi. Nadi ke paas gaya aur woh wahi par hi baith gaya. Ab woh Nadi ko bohut dhyaan se dekh raha tha. Nadi ka paani itna shaant tha. Wahi baithe-baithe use neend lag gayi aur kariban bhor ke 4-4:30 baje uski neend tooti. Barsaat shuru ho chuki thi aur ek kutta aashray lene ke liye ek ped ke neeche ja khada hua. Tabhi woh ped toota aur us kutte ke upar gir gaya. Kutta nirantar prayas kar raha tha ped se bahar nikalne ki parantu uski koshish vifal hoti jaa rahi thi. Ajay ped ke paas pahuch kar ped ko hataane ka prayaas kar raha tha. Lekin ek haare hue manushya se aap kya ummed kar sakte ho? Kuch der prayas ke baad Ajay thak haar ke baith gaya. Kutta bhi apne dusre pair se ped ko hatane ka prayas kar raha tha. Lekin kuch nahi ho paaya. Parantu yeh kutta haar maanne wala nahi tha. Usne thodi aur himaat dikhayi aur kuch prayason ke baad woh palatne mein safal raha. Phir woh apne panjon se ped ko nochne ki koshish kar raha tha parantu kuch na ho paaya. Uske baad woh apne dusre pair se ped ko sarkaane ka prayas karne laga. Kuch der ke baad woh ped dheere-dheere khisak raha tha. Ant tah woh kutta us ped ke changul se aazad ho gaya. Aur ladkhadate hue woh kutta chal diya apne raaste. Yeh sab dekhkar Ajay ki aankhein phati ki phati reh gayi. Woh yeh sochne laga ki ek bezubaan jaanwar jiski main bhi madad nahi kar paaya usne haar nahi maani aur main dekho kya karne aaya tha yahan. Use apne aap par sharam aa rahi thi. 'Main manushyata par ek kalank hoon.' 'Mujhe aaj apne manushya hone par sharam aa rahi hain.' Tabhi use dubaara apne ek shikshak ki baat yaad aayi, 'Moti hamesha samudra ke tat par hi milta hain.' Ajay ne nirnay le liya ki ab chahe jo bhi ho jaaye woh, haar nahi maanega. Aur woh har haal mein jeevan ke antim shan tak prayas karega. Aur woh apne ghar chala gaya.
Ab Ajay roz subah ek nayi aasha ke saath uth ta hain. Haalanki aaj bhi woh karz mein hain parantu woh roz kuch na kuch prayaas karte rehta hain isi aasha mein ki woh ek din in saari vipatti se bahar nikal aayega.
- Ved Vineet Gautam
