मॉडर्न रसिया (हास्य कविता)-अल्हड़ बीकानेरी

असली माखन कहाँ आजकल ‘शार्टेज’ है भारी, चरबी वारौ ‘बटर’ मिलैगो फ्रिज में, हे बनवारी, आधी टिकिया मुख लिपटाय जइयो, बुलाय गई राधा प्यारी, कान्हा, बरसाने में आय जइयो, बुलाय गई राधा प्यारी। मटकी रीती पड़ी दही की, बड़ी अजब लाचारी, सपरेटा कौ दही मिलैगो कप में, हे बनवारी, छोटी चम्मच भर कै खाय जइयो, बुलाय गई राधा प्यारी, कान्हा, बरसाने में आय जइयो, बुलाय गई राधा प्यारी। नंदन वन के पेड़ कट गए, बने पार्क सरकारी, ‘ट्विस्ट’ करत गोपियाँ मिलैंगी जिनमें, हे बनवारी, ‘‘संडे’ के दिन रास रचाय जइयो, बुलाय गई राधा प्यारी, कान्हा, बरसाने में आय जइयो, बुलाय गई राधा प्यारी। जमना-तट सुनसान, मौन है बाँसुरिया बेचारी गूँजत मधुर गिटार मिलैगो ब्रज में, हे बनवारी फिल्मी डिस्को ट्यून सुनाय जइयो बुलाय गई राधा प्यारी कान्हा, बरसाने में आय जइयो, बुलाय गई राधा प्यारी, सुखे ब्रज के ताल, गोपियाँ ‘स्विमिंग-पूल’ बलिहारी पहने ‘बेदिंग सूट’ मिलैंगी जल में, हे बनवारी उनके कपड़े चुस्त चुराय जइयो बुलाय गई राधा प्यारी। कान्हा, बरसाने में आय जइयो बुलाय गई राधा प्यारी। ‘रॉकेट’ बन उड़ गई चाँद पर रंग-भरी पिचकारी, गोपिन गोबर लिए मिलैंगी कर में, हे बनवारी, मुखड़ौ होली पै लिपवाय जइयो, बुलाय गई राधा प्यारी, कान्हा, बरसाने में आय जइयो, बुलाय गई राधा प्यारी। सूनौ पनघट, फूटी गगरी, मेम बनी ब्रजनारी, जूड़ौ गुंबद-छाप मिलौंगो सिर पै, हे बनवारी, दरसन कर कै, प्यास बुझाय जइयो, बुलाय गई राधा प्यारी, कान्हा, बरसाने में आय जइयो, बुलाय गई राधा प्यारी। -अल्हड़ बीकानेरी