इहै हउवै भइया मोरे भारत कै बस्ती ( गाँव दर्शन)

जँहवा देखाय पाँच सालन मा हस्ती । उहै हउवै भइया मोरे भारत कै बस्ती ॥ ढनगै दुवारे पै टाठी अव लोटा । अौ लोटा के बगलै ऊ बाँसे कै सोंटा ॥ छनही मा लडि बइठै अपुनै मा कुश्ती । दिन भै कमाय करै संझा के मस्ती ॥ इहै हउवै भइया मोरे भारत कै बस्ती ॥ फटेहाल कुर्ता फटा बा पजामा । फटेहाल सुइटर फटा है दुशाला ॥ बहेला दुवारे पण्डोहे कै नाला । आव नालै पै बिक रहा झाला अव बाला ॥ केहू खेलै गिट्टी केहू तासपत्ती । केहू खेलै दहिला केहू तीन पत्ती ॥ बाँध लियै अँचरे मा चुटकी भय सुर्ती । थाम लियैं हाथे मा हँसिया अव खुर्पी ॥ इहै हउवै भइया मोरे भारत कै बस्ती ॥ केहू जाता मेला केहू जाता ठेला । केहू जाता अँगनै मा मेहरी से रेला ॥ केहू जाता डिहवा पै दीयै कराही । केहू सोचै बेटवा कै मूडन कराई ॥ काली के मन्दिर मा बाजात् घण्टा । अव बैठे पुजारी पियाथउवें ठण्डा ॥ केहू जा बेचाता बजारी मा बण्डा । लहरै अयोध्या मा भगवा कै झण्डा ॥ बइठे दलानी सोचाथउवैं दद्दा । बढिगै मँहगाई चले कइसे कस्ती । जँहवा देखाय पाँच सालन मा हस्ती । इहै हउवै भइया मोरे भारत कै बस्ती ॥ केहू खोले बकरी केहू खोले बकरा । केहू कै भंइस ताले केहू कै भंइस पोखरा ॥ केहू काटै कोयर केहू लावै भूसा । केहू काँछै सरिया जवन बैल मूता ॥ लाला रोज आवै करै का तगादा । बा केतनी गरीबी ना उनका जनाता॥ साकेतपुरी का देखावाथे खाता । हजारा कै अर्थी उठल ना देखाता ॥ हजारा कै अर्थी उठल बस्ती बस्ती इहै हउवै भइया मोरे भारत कै बस्ती ॥ अनिल साकेपुरी