हमार जान ह भोजपुरी

हमार सान ह

हमार पहचान ह भोजपुरी

हमार मतारी ह

हमार जान ह भोजपुरी.

इहे ह खेत, इहे खरिहान ह

इहे ह सोखा, इहे सिवान ह

हमार सुरुज ह

हमार चान ह भोजपुरी.

बचपन बुढ़ापा ह, इहे जवानी

चूल्हा के आगि ह, अदहन के पानी

हमार साँझ ह,

हमार बिहान ह भोजपुरी.

ओढिला इहे, इहे बिछाइला

कुटिला इहे, इहे पिसाइला

हमार चाउर ह

हमार पिसान ह भोजपुरी

इहे ह धरन, इहे ह छानी

हमरा पसीना के इहे कहानी

हमार तीर ह

हमार कमान ह भोजपुरी.

कजरी ह बिरहा ह, इहे ह फ़ाग

इहे कबीरा ह इहे ह घाघ

हमार बिरासत ह

हमार ईमान ह भोजपुरी.

*******