गजबे बा इ देश रे भइया
खल खल के गीत गावेला ।
सत्य बुद्ध के कहाँ गइल
उपनिषद के शांति कहाँ गइल
राष्ट्रपिता के अहिंसा
कहाँ भगत के क्रांति गइल ।
उज्जर झक खादी के ऊपर
छलिया दाग लगावेला ।
पंचयत के चौपालन पर
पांचाली के चीर हराता
लाशन के टीला पर बइठल
भेड़िया अजब गजब मुस्काता ।
अखबारन के पन्नन से
गंध चिराइन आवेला ।
लोकतंत्र के सुन्दर मुँह पर
घाव भइल बा भारी
चोर उचक्का राजा बनले
मेहनतकश भिखारी ।
छल परपंच करेवाला ही
एहिजा सब कुछ पावेला
डॉ. हरेश्वर राय
सतना
मध्य प्रदेश
