बो विश्वगुरु भारत देश कठे

@@@@@ बो विश्वगुरु भारत देश कठे @@@@@ ******************************************************* मानवता है धर्म जकारो ,बे मिनख भलेरा आज कठे | भ्रष्टाचार ने रोक सके , इसो भलेरो राज कठे || पति रो दुखड़ो बाँट सके ,बा सती सुहागण नार कठे| घर ने सरग बणा सके ,बा लुगाई पाणीदार कठे || लुगाई ने सम्भाळ सके ,बो मर्द असरदार कठे| धणयाणी ने समझ सके ,बो धणी समझदार कठे|| भरोसो नहीं टूटे किरोई ,इसो अबे व्योहार कठे | खोट -मिलावट नहीं होवे ,इसो अबे व्योपार कठे|| माने माँ -बाप रो कहणो ,इसी अबे औलाद कठे| जंग नहीं लागे जिण में, इसो अबे फौलाद कठे || देश रे खातिर मर मिटे ,इसा नेता आज कठे| जनता रो दुखड़ो मिटा सके ,इसो अबे राज कठे|| आबादी ने रोक सके ,जनता में इसी जाग कठे| गरीबी नहीं रेवे देश में ,देश रा इसा भाग कठे || झूठ -कपट ने रोक सके, इसा अबे लोग कठे | सारा लोग सुखी हो जावे ,इसा अबे जोग कठे || बोली में मिश्री घोळ सके ,बा कोकिल कंठी नार कठे | हिरदे में हेत जगा सके ,बा जीणे री आधार कठे || तन -मन ने निरोग राखे,इसी अबे खुराक कठे | जुर्मी डर सू धूजण लागे ,पुलिस री इसी धाक कठे|| कायर ने वीर बणा सके ,कवियां रो बो सन्देश कठे | दुश्मन धूजे जिण रे सामे ,वीरां रो बो देश कठे || देवी रो रूप दिखे जिण में ,छोरयाँ रो बिसो वेश कठे| दुनिया ने मार्ग दिखाणे वाळो ,बो विश्वगुरु भारत देश कठे|| ************************************************************